Alabama state-in nau tihtlak khapna bill a pass
US-a Alabama senate chuan nau tihtlak khapna bill khauh tak a pass. He bill hian pawngsual tawh vanga nau paite pawh an tihtlak a khap tel vek a, nau lo tihtlak saktu doctor-te chu damchhung lungin tantir theih an ni dawn a ni. He bill hi Governor Kay Ivey-in a sign hunah danah chantir a ni ang.
Senate-a bill pharh hi a thlawp lamah vote 25 a tla a, a duh lo lamah vote ruk a tla. Kumin February thla khan Alabama House of Representative chuan bill hi a lo pass tawh bawk a ni. Bill pass thar hnuaiah hian nau tihtlak chu pawikhawihna lian tak anga ngaih a ni dawn a, nau tihtlak saktu doctor chu kum 10-99 thleng tantir theih a ni ang. A naupai lai a ṭhat loh avanga a nu nunna dinhmun derthawnga a awm chauhin nau tihtlak hi phalsak a ni ang.
Alabama bill pass hi sawiseltu an tam hle a, US-a human rights defence organisation lian ber ACLU chuan he dan hi a taka hman a nih theih lohna turin an khing dawn tih a sawi. ACLU chuan, "Bill hian pawngsual tawktu thlengin a hrem tel a, vanduaina an tawh avanga nau an pai a nih pawhin a nau chu paitlang tir a, hrin luih tir an ni dawn a ni, " a ti.
Hetih lai hian Alabama Lieutenant Governor Will Ainsworth chuan bill an pass ta chu nau la piang chhuak lote dikna humhalhna tura hmalakna chak tak a nih thu a sawi.