UN secretary-general hlui Perez de Cuellar a thi
UN secretary-general hlui Javier Perez de Cuellar chu kum 100 mi niin Peru khawpui, Lima-ah anni huna Nilaini khan a thi.
Kum 1982-1991 inkara UN secretary-general term hnih chelhtu leh UN secretary-general pangana, Perez hi kum 1980 chhoa Iran leh Iraq indo chhoh laia remna palai thawktute zinga a khaipa ber a ni a, kum 1988 August 20 khan Iran leh Iraq inkara innghirnghona chu amah vang hian a tawp fel thei a ni.
Perez hi kum 2000-2001 khan an ram, Peru prime minister hna a lo chelh tawh a, an ram aiawhin France-a Peru embassy-ah secretary hna a chelh tawh bawk a, United Kingdom, Bolivia, leh Brazil-a an ram embassy-ah te hna a lo thawk tawh ṭhin bawk a ni. Switzerland, Soviet Union, Poland leh Venezuela-ahte pawh ambassador hna thawkin a awm tawh. A dam chhung hian an ram Peru mai bakah khawvela democracy tundin zel a nih theihna kawnga hnathawktu ropui takte zinga mi a ni.
Kum 2005, July 22 khan Perez hi heart attack a neih avangin Paris-a damdawi-inah enkawl a lo ni tawh a ni. Kumin January 19 khan kum 100 a tling a, Peru prime minister ni tawh zingah dam rei ber a ni. A hriselna ṭha lo chhoin, hun eng emaw chen enkawl a nih hnuah March 4 khan an ram khawpui Lima-a a chenna inah a thi tih a fapa, Francisco Perez de Cuellar chuan a sawi a ni. Vawiin hian Perez vuina hun hi Peru foreign ministry headquarters-ah neih a ni ang.