Trump-a president hnuah Israel settlement fund a pung
United States President atana Donald Trump thlan tlin a nih hnuah, Israel chuan Palestinian ram a luah, West Bank-a Juda-te chenna in tur siamna atana a sum dah chu a pung nasa hle nia sawi a ni.
Israel finance ministry-in goverment statistics a tihchhuahah, West Bank-a Israel sorkar sum sen chu kum 2016 khan US dollar maktaduai 330 a ni a, mahse Trump-an US President office a luah kum khatna, kum 2017 khan Israel sum hman hi dollar maktaduai 459-ah a kai chho nghal .
Kum 2017-a West Bank-a Juda-te tana Israel sorkar sum hman hi kum 15 chhunga a san ber kum a ni. A sum hman tlem ber kum chu kum 2009 kha a ni a, hetihlai hian US President chu Barack Obama a ni. Barack Obama leh hetihlaia Israel Prime Minister Benjamin Netanyahu-te chu an inkar boruak a ṭha lutuk lo nia sawi a ni. Hemi kuma Israel sum hman hi dollar maktaduai 210 chauh a ni.
Anti-settlement monitoring group, Peace Now-a researcher, Hagit Ofran chuan Trump-a thlan tlin a nih hnuah Israel chuan a ram luaha hma lak chu a inthlahrung lo zual nia a lan thu a sawi. Zalen takin an duh angin thil an ti tawh a ni, a ti. Palestinian President Mahmoud Abbas-a thupuangtu, Nabil Abu Rdeneh pawhin hemi chungchang hi na taka sawiselin, US sorkar chuan Isarel chu dan kalha thil a tihna turah a fuih phur zawk tih a langchiang hle tih a sawi.
1967 Mideast war-a Israel-in West Bank leh East Jerusalem an lak hnuah khan heng hmun pahnihah hian Juda mite chenna tur in nuai sarih vel zet a sa tawh a ni.