June thlaah SKorea leh US hruaitute inhmu dawn

United States Pre­sident Donald Trump chuan June thlaah South Korea a tlawh dawn a, North Korea nuclear programme chungchang a sawipui dawn tih White House thuchhuah chuan a tarlang. 

President Trump hi June 28-29-ah Osaka, Japan-a G20 summit hmang turin a kal dawn a, hemi rual hian SKorea hi a tlawh kawi dawn a, SKorea President Moon Jae-in a hmu dawn a ni. 

White House chuan President Trump leh President Moon-te hian NKorea-in a nuclear programme a tihtawp a, nuclear ralthuam tihbo a nih theihna tura an hmalakna tih hlawhtling turin an thawhdunna chu an chhunzawm zel dawn a ni, ti. 

Kumin February thlaa Trump leh NKorea hotu Kim Jong-un ten Vietnam-a summit vawi hnihna an neihah khan Korean Peninsula aṭanga nuclear ralthuam tihbo dan chungchangah inremna mumal siam thei loin an ṭin a ni. 

Hruaitu pahnihte inbiakna a hlawhchham hnuah Trump leh Moon hian hma lak zel dan turte sawidunin an lo inhmu tawh a, June thla hian a ṭum hnihna atan an inhmu leh dawn a ni. 

South Korea pre­sidential office pawhin President Trump-an an ram a tlawh tur chung­changah thuchhuah a siam tawh bawk.