Guatemala dictator hlui fanu Inthlan a chuh khapsak

Guatelama dictator hlui Efrain Rios Montt-a fanu, Zury Rios chu Consti­tutional Court chuan June 16-a an ram president thlanna neih turah a chuh ve a phalsak lo. 

Zury Rios-i hian hun rei tak politics a khel tawh a, Congress-ah pawh term li thlan tlin a ni tawh bawk. Tunhnaia president thlanna neih tura mipui ngaihdan lakah pawh dinhmun sang ber dawttuah a awm a ni. Mahse Constitutional Court chuan right-wing Valor party president candidate hi inthlana a chuh a khapsak ta a ni. 

Gautemala danpui hian tharum emaw, sipai chakna emaw  hmanga thuneihna changtu chu president thlannaah a chuh a khapsak a, he khapna hian a chhungte pawh a huam tel a ni. Rios-i pa, dictator hlui General Efrain Rios Montt hian sipai chakna hmanga thuneihna a chan avangin a fanu pawhin a tuar dawn ta a ni. 

Constitutional Court secretary Martin Guzan chuan he dan hi democracy humhalhna tur a ni tih a sawi a, electoral tribunal hnenah Rios-i candidate a nihna chu hlihsak turin thu a pe zui nghal bawk. Rios Montt hian kum 1982 March thla aṭanga 1983 August thla thleng Guatemala-ah ro a rel a, a rorel chhung hian sipai leh helpawl inkarah indona thlengin mi nuai hnih vel zetin an thih phah a ni. UN thlawp truth commission chuan Guatemala rama insuatna nasa tak thleng­ah hian sipaite chu mawh­phurtuah a puh a, sipai kuta thi tam zawk hi Maya civil mi an ni. 

Kum 2013 khan Rios Montt hi Maya civil mi 1,771 suat an nih chungchangah mawhphurtua puhin thiam loh chantir a ni. Mahse hrem­na pek tur tihchhuah a ni hmain nikum khan a thi a ni.