Myanmar sipai hotu Ming Aung Hlaing Twitter account tihtawp sak

Myanmar-a Rohingya Muslim mi tam tak thah an nih chungchanga mawhphurtua puh, sipai hotu Twiiter account chu tihtawp sak a ni. 

Myanmar Army-a commander-in-chief Ming Aung Hlaing hi a Twitter chu inhuatna chawk tho thei lam hawi sawichhuahna atana hmanga puh a nih avangin complaint thehluh a ni a, hei vang hian tunkar tir lam aṭang khan a Twitter account, @sgminaunghlaing chu tihtawp sak a ni. Kum 2018 August thla khan a Facebook account pawh paihsak a lo ni tawh bawk. 

Ming Aung Hlaing hian kum 2017-a Myanmar aṭanga Rohingya mi nuai sarih vel zet an tlanchhiat chungchangah khan sipaite chuan tharum an hmang lo tih a sawi. Sipai hotu hian social media-ah Rohingya-te chu 'Bengali' tiin a sawi ṭhin a, Myanmar citizen anga sawi loin an rama pemlut tia a sawina a ni. Facebook-ah hian sipaite chuan Rohingya Muslim-te an pawng beih lo a, helho chauh an bei tih a sawi bawk.