US-in blacklist-ah Huawei company dah

US Commerce Depart­ment chuan Chinese com­pany, Huawei Tech­nologies Co. Ltd leh he company zawmtu dang 70-te chu 'entity list'-ah a telh a, US company-te chu Huawei hnena hmanrua an hralh khapsak an ni. 

Entity list-a telhte hian US firm aṭangin sorkar phalna nei loin component leh technology-te an la thei lo a ni. Huawei hi US supplier-te chungah a innghah nasat avangin a laka hrekna siam a nih avang hian a thil siam ṭhenkhatah harsatna a tawk dawn a ni. He hremna hi nimin aṭang khan hman nghal a ni. 

Chinese Commerce Ministry thupuangtu Gao Feng chuan insumdawnna kawngah ram pahnihte inkar boruak ṭha lo leh, chhiah lak zat an intihsan tawn hnuah US chuan boruak ṭha lo dang siamna tur chu a pumpelh a ngai a ni, a ti. "China sorkar chuan Chinese firm-te dikna chanvo humhalh sak turin a ṭul angin hma a la zel dawn a ni," a ti. 

Huawei chuan Ame­rican company aṭanga hmanrua an lei theih loh chuan America mi hnathawk mi sing tel a nghawng dawn tih an sawi a, company-te sum dinhmun thlengin a khawih pawi thei dawn a ni, a ti. Kum 2018-a Huawei-in an hmanraw mamawh an leina US dollar tluklehdingawn 70 zinga tluklehdingawn 11 chu US firm ten an dawng a, an zingah hian Qualcomm, Intel leh Micron Technology Inc. te pawh an tel. 

An harsatna tawh chinfel dan tur hi rang taka ngaihtuah an tum thu Huawei chuan a sawi. US official-te chuan China sorkar hian Huawei hmanruate hi America mite enthlakna atana a hman an hlauhthawn thu an lo sawi fo tawh a ni.