Brazil president hlui Temer chhuah tir

Brazil president hlui Michel Temer chu Sao Paulo state-a Military Police headquarters-ah kar khat chhung hren a nih hnuin chhuah a ni a, eiruk thubuai a neih ngaihtuah hun tur chu jail pawn lam aṭangin a nghak thei dawn a ni. 

Kar kal ta khan Temer hi police-te kutah a inpe a ni. Mahse Thawh­lehni khan Superior Court of Justice (STJ) Sixth Panel chuan Temer hi chhuah lailawk a phalsak a ni. STJ chuan president hlui hi dan kalhin a che chhunzawm zel a ni tih finfiahna a awm loh thu a sawi a, hei vang hian a thubuai ngaihtuah a nih hmaa lo hren lailawk chu a dik lo tih a sawi a ni. 

President hlui hi thuneihnaa chan laia Angra dos Reis-a nuclear power plant Angra 3 siamnaa eirukna lian tak thlengah inhnamhnawiha puh a ni. Michel Temer hi chhuah tir ni mah se a passport chu thuneitute kuta thehlut tura tih a ni a, a address pawh a thlak danglam tur a ni lo tih a ni bawk. Eiruk thubuai a neih mekah inhnamhnawiha puh dangte chu a biakpawh phalsak a  ni lo bawk.