China aiin ram dangah Covid-19 darh chak zawk : WHO Director-General

World Health Organization (WHO) Director-General Dr. Tedros Adhanom Ghebreyesus chuan China aiin ram dangah Covid-19 chu a darh chak zawk thu a sawi.

He thu hi Dr. Tedros chuan Swit­zerland, Geneva-a WHO head­quaters-a daily briefing an neih­naah a sawi a ni. China-a nitina Covid-19 hri darh zel punna aiin ramdanga he hri kai punna hi a san chak tawh thu sawiin, tunah chuan tihtak zeta kan buaipui a ngai tawh a ni, a ti.

"Darkar 24 chhung khan ram 8-ah ngawt he hri kai thar hi hriatchhuah a ni a, heng ramte hi Brazil, Georgia, Greece, North Macedonia, Norway, Pakistan leh Romania te a ni. "Lungngaihthlak viauin lang mah se, ram dangten China-a inenkawlna an pek anga kan tih ve theih chuan he hri leng darh zel hi zawi zawiin kan thunun thei dawn a ni," tiin Dr. Tedros chuan a sawi.

He hri leng kaithar hi China tih lohah chuan Iran, Italy leh South Korea ramah an tam ber a, an ni ram tel hian ram 50-ah he hri hi a darh tawh a ni. Hei vang hian ram hrang hrangte ṭan ho a pawimawhzia Dr. Tedros chuan sawiin, fimkhur tak leh mumal taka he hri laka invenna atan ram hrang hrangte thawhpuiah a sawm.

Kum 2008-a global financial crisis a thlen hnuah, khawvel econo­my hian khatianga harsatna kha a la tawk leh lo. Mahse Covid-19 hi ram danga a darh chho zel a nih chuan kum 2008-a khawvel economy chhiatna ang kha a thlen leh theih thu mithiamte chuan an sawi.

Ningani khan U.S. stock market-a S&P 500 index chu 4%-in a tlahniam a, he hri darhna ram aṭanga Saudi Arabia-a ram thianghlim tlawh turte Visa pawh Saudi Arabia sorkar chuan a titawp lailawk a, hei vang hian tourism lama an sum hmuh tur pawh a tlakhniam hle rin a ni. North Korea sorkar pawhin an khawpui Pyongyang-a school leh kindergarten-te chu khar rih turin a hriattir a, an ramria venhimna pawh khauh takin a kalpui mek bawk. Japan prime minister Shinzo Abe pawhin an ram puma school-te chu hri leng avang hian kum danga March thla tawp lama khar ṭhin chu kuminah March 2 aṭanga khar turin a ti. School khar tur hian zirlai naupang maktaduai 12.8 a nghawng dawn a ni. 

South Korea-ah pawh Bank of Korea-a main policy rate chu a hniam ber ṭum thlengin, 1.25% ah a hniam thla. Japan-ah hian naupangte intihhlimna hmun lar tak, Tokyo Disneyland pawh kar kal ta Inrinni aṭang khan khar a ni a, kumin July thlaa summer Olympic 2020 an neih tur pawh, an thleng thei dawn em tih a chiang ta lo. 

Nimin khan he hri kai thar hi China-ah hian mi 327 an awm. China ramchhung bikah hian mi 78,800 in he hri hi an kai tawh tih finfiah a nih bakah, he hri vanga thi hi mi 2,800 an tling tawh bawk.