Brazil-ah ni khatah Hri kai thar 90,000 chuang awm
Brazil ramah chuan Nilaini khan Covid-19 hri kai hmuh chhuah thar mi 90,303 an awm a, hri kai thar leh hripui thihpui hi an la pun belh zel.
Health ministry chuan Nilaini vek khan hripui vanga thi mi 1,648 awm belh lehin, he hri vanga thi hi mi 2,82,000 chuang an awm tawh a ni. Brazil hi US dawta Covid-19 thihpui tam ber ram a ni. Thawhlehni khan hri vanga thi hi mi 2,841 awmin, ni khata an rama hripui vanga thi an tam ber ni a ni.
Hri leng dona kawnga president Jaiar Bolsonaro hmalakna hian sawisel a hlawh fo tawh a, hri leng rawn hluar thar leh pawh thunun a nih theihna tura hma la tura nawrna pawh a tawk chho leh mek a ni. Tun kar tir khan President hian health minister thar a ruat leh a, hei hi nikuma a rama hripui a len hnua health minister palina a ni.
Khawvel pumah hri kai pung chho leh
World Health Organisation (WHO) chuan kar liam ta khan khawvel pumah hri kai hi 10% in an pung chho leh tih a sawi a, America leh Europe ramah te hri leng hi a hluar chho leh mek tih a sawi.
World Health Organisation (WHO) chuan kar liam ta khan khawvel pumah hri kai hi 10% in an pung chho leh tih a sawi a, America leh Europe ramah te hri leng hi a hluar chho leh mek tih a sawi.
Nilainia WHO-in report a tihchhuahah January thla tir lama khawvel puma kar khata hri kai hmuh chhuah mi maktaduai 5 dawn an nih khan, February thla laihawl chuan maktduai 1.5 velah a tlahniam tawh niin a sawi. Hri kai hi hun eng emaw chen a tlakhniam hnuah kar thum chhung chu an pung chho leh tawh tih a sawi a, kar liam ta chhunga hri kai hmuhchhuah thar leh thipui zinga 80% chuang chu America leh Europe rama mite an ni.
John Hopkins Univeristy data-a a lan danin,nimin thleng khan khawvel pumah Covid-19 hri kai hmuh chhuah tawh hi 121,139,773 an tling tawh a, an zinga 2,679,932 chu he hri hi an thihpui tawh bawk. US chu hri kai leh hri thihpui tamna ber ram a la ni chhunzawm zel a, an ramah hri kai hmuh tawh zat hi 29,604,820 niin, Covid-19 vanga thi hi 538,050 an awm tawh a ni. Brazil chu hripui thihpui tamna ram pahnihna niin, Mexico in a dawt.
India, UK, Italy, Russia, France, Germany, Spain, Colombia, Iran, Argentina leh South Africa-ahte Covid-19 vanga thi hi mi 50,000 chuang an awm tawh hlawm a ni.