Suu Kyi thubuai siam belh sak dawn

Myanmar sipaite chuan ram hruaitu an paihthlak tak, Aung San Suu Kyi chu eiruk thubuai siam belh sak leh an tum. 

February 1-a sipaiten civil sorkar thuneihna an hnehchhuh  hnuah kum 75 mi, Suu Kyi manin tun thlengin an la hreng a ni. An hren hnuah ram dang aṭanga dan loa walkie talkie radio lalut leh, coronanvirus restriction palzutah puhin thubuai siamsak a ni tawh. 

Kar liam ta khan sipai thupuangtu chuan thamna laah Suu Kyi hi a lo puh tawh bawk. Hemi hnu, Nilaini zan khan sipai sorkar TV, Myawady chuan sumdawng pakhatin Suu Kyi hnenah USD 550,000 a pek thu a sawina video chu an tichhuak. Property developer, Maung Weik chuan a sumdawnna dinhmun siamṭhatna atan sorkar mi pawimawhte hnenah pawisa a pek thu a sawi a ni. 

Suu Kyi hnenah sum a pek thu sawina video tihchhuah a nih hnuah, TV thupuangtu chuan Suu Kyi hi eiruknaa a lo inhnamhnawih avangin thuneitute chuan anti-corruption law hnuaia thubuai siamsakna tur an buaipui mek a ni, a ti.