Tanzania President John Magufuli a thi

Tanzania president John Magufuli chu hun eng emaw chen mipui hmuha a inlan loh hnu leh, a chin hriat loha a awm hnuin  a thi tih Nilaini zan khan vice president Samia Suluhu Hassan chuan a sawi. 

TV-a thu a sawiah Vice President chuan kum 61 mi, President hi kum 10 zet natna a lo nei tawh, a lung lam ṭhat loh vangin Dar-Es-Salaam hospital-ah a thi tih a sawi a ni. Hassan chuan President hi March 6 khan  Jakaya Kikwete Cardiac Institute-ah admit a ni a, mahse rei loteah chhuah leh nghal a ni, tiin, March 14 khan a dinhmun a ṭhat loh leh avangin hospital hi panpui a ni leh tih a sawi. 

Magufuli a thih tak avangin an ram danpui hnuaih Hassan hian President dinhmun hi chelhin, Magufuli term la hman zawh loh chu a hmang zo dawn a ni. Magufuli hi President kum nga term chelh tur hian nikum October thla khan thlan tlin nawn leh a ni. February 27 aṭang khan Magufuli hi mipui hmuhah a inlan tawh loh avangin an ram mipuite chuan a dinhmun leh awmna te puangzar turin sorkar an nawr a ni. Social  media lamah Covid-19 hri a kai tih te, a  dam ṭha lo hle nia sawite a awm a, mahse hei hi sorkar official lam chuan an pha tlat thung a ni.