Russia-in US-a a palai ko haw

US President Joe Biden-a'n an ram inthlana inrawlhah Russia puhin, hei vang hian Russia president Vladimir Putin pawhin a man a pek ngei a ngai dawn tih a sawi hnuah Russia sorkar chuan Washington-a a ambassador a ko haw. 

Russia sorkar chuan US nena an inzawmna chuan awmzia a nei loh chhoh tak avangin an ambassador, Anatoly Antonov chu an ko kir tih a sawi a ni.  ABC News-in a kawmnaah President Biden chuan American intelligence report-in nikum November thlaaa US President thlanna neih atana campaign-naa Putin-an Russia inrawlhna tura a tih chungchang an sawite a sawichhuak a ni. He report-ah hian Russia chu Biden-a'n a hneh tak, president hlui Donald Trump a chak theihna atana inrawlh tumah puh a ni. 

Putin-a thupuangtu, Dmitry Peskov chuan Russia leh Putin an puhnate hi finfiahna awm lo a nih tih thu leh, hetianga an inpuhna hian ram pahnihte inlaichinna a tichhiat belh zel theih tur thu a lo sawi tawh bawk. Russia foreign ministry chuan US-a an ambassador hi US nena an inlaichinna chungchangah eng anga hma lak zel tur nge tih sawipuite a ngaih avangin Moscow-ah koh haw a ni tih a sawi a, hemi rual hian ram pahnihte inkar chhe zel tur ven chu an duh tih a tarlang bawk.