Myanmar sipaiten mi 8 kaphlum leh

Mynmar sipaite chuan nimin khan sipai rorelna duh lohna lantira nawrh huaihawt zinga mi pariat an kaphlum leh nia sawi a ni. 

Aungban khuaa nawrh huaihawta pungkhawmte chu security force-ten hnawhdarh tumin tear gas-in an phuh a, a hnuah silai an kap zui a ni. Security force-te silai hmehpuahna hmunah mi pasarih an thi nghal a, mi dang pakhat chu Kalaw khuaa damdawi-in panpui a nih hnuah a hliam tuar loin a thi ve leh bawk.

Nimin vek khan police-te chuan Yangon khawpuiah nawrh huai­hawtte chu security force-te lak aṭanga indaidanna an siamte chu an ṭhiah luihtir nia sawi a ni.

Mandalay, Myingyan, Katha leh Myawaddy khuaahte nimin khan mipuiten nawrh an huaihawt chhunzawm leh bawk. February 1-a sipaiten civil sorkar thuneihna an hnehchhuh avanga lungawi lohna lantira nawrh huai­hawtte leh sipaite inkara buaina chhuakah, nawrh huaihawt zingah mi 220 chuang an thi tawh a, mi 2,000 chuang man an ni tawh bawk a ni. 

Yangon aṭangin mi tam tak tlanchhe tawh
Myanmar khawpui lian ber Yangon-a chengte mi eng emaw zat chuan hmun him lam panin khawpui hi an chhuahsan tawh niin media report ṭhenkhat chuan a tarlang. 

Sipaite chuan Yangon-a hmun ṭhenkhatah martial law a puang tawh a, he hmuna cheng mipui maktaduai hnih dawn chu sipai te chuan an thuneihna hmangin an thunun a ni. Nimin khan Yangon khawpui chhuahsan a, thingtlang lama tlanchhia an awm nual tawh thu media ṭhenkhatte chuan an tarlang a ni. 

Tualchhung buaina a punlun chhoh zel avangin Myanmar ram mi eng emaw zat chu ram dangah a tlanchhe tawh nia sawi a  ni a, hei vang hian an ram ṭhenawm Thailand pawhin Myanmar aṭanga raltlan lut turte lo dawngsawng turin an inbuatsaih mek tih an sawi. 
Myanmar ramri bul, Thailand-a Tak province thuneitute chuan an rama tlanchhiate lo awm tirna tur an buatsaih mek tih sawiin, mi 30,000 - 50,000 vel chu an lo pui thei dawn niin an sawi.