Syria-in Turkey sipai 33 that
Syria hmarchhak lama awm Idlib province-ah Syria sipaiten Ningani tlai khan Turkey sipaite chu thlawhtheihna hmanga beiin, sipai 33 an thahsak.
He thil thleng vang hian Turkey president Recep Tayyip Erdogan chuan Ankara-ah emergency meeting ko nghalin,minister-te leh sipai lama thuneitu sangte an tel. Turkey communications director Fahrettin Altun chuan Idlib province-a Syria bukhuarna an hriat zawng zawng chu Turkey chuan a beih dawn thu a sawi.
Ningani a thil thleng hi kum kua liamtaa Syrian civil war hnua Turkey leh Syria inrinaa Turkey sipaite thihna thlen tamna ber a ni. Turkey president Erdogan chuan February thla chhunga Idlib province-a Turkish observations post hnaiha awm, Syria sipaite chu he post hnaih aṭanga an inthiarfihlim loh chuan beihah a lo vau tawh bawk a ni.
Turkey sipaite beihna thleng hian Turkey leh Russia inkar a khi ang tih hlauhthawnna a nasa hle bawk a, beih an tawk chung pawh hian Turkey chuan an rama aṭanga Syria raltlan Europe-a kal turte chu dan an tum loh thu an sawi. Russia hi Syria sorkar thlawptu a ni.
Syria sipaite thil tih hi UN Secretary-General Antonio Guterres chuan thil pawi tak a nih thu sawiin, ram pahnihte chu inkap tawn lo turin a ngen bawk. US pawhin NATO thawhpui Turkey chu a ṭan zawk thu rawn sawi langin, he thil thleng hi pawi an ti tak zet tih US state department chuan a tarlang.
Syria raltlante hi Turkey leh Syria ramria awm, Idlib aṭangin Europe-ah an lut ṭhin a ni. Turkey-ah hian Syria raltlan maktaduai 3.6 vel an awm nia hriat a ni bawk.