US leh China inbiakna hlawhtling tawk lo

US president Joe Biden-a'n thuneihna a chan hnua US-China high level meeting hmasa ber chu Alaska-ah neih a ni a, mahse he huna inbiakna hi a hlawhtlin tawk lo a ni.

Alaska-a inbiakna an neihah hian US aiawhin US secretary of state Antony Blinken leh national security adviser Jake Sullivan an tel a, China aiawhin China top diplomat Yang Jiechi leh state councillor Wang Yi an tel. He hunah hian Antony Blinken chuan Xinjiang-a Uighur muslim ho chunga China hmalakna te, Hong Kong-a dan thar siam te, Taiwan-a China hmalakna chungchang a sawi lang a, US-in China aṭanga cyber attack an tawh fo thute pawh a sawi bawk. 

Hengte avang hian khawvel boruak a ralmuang lo niin Blinken chuan a sawi. Yang jiechi chuan chhangin, US chu sipai leh pawisa hmanga ramdangte awpbetah a puh let thung. US chu human rights chung changah hna a tawh ṭhat tawh an beisei tih Yang jiechi chuan a sawi a, US-ah hian human rights chungchangah buaina a awm fo a, Black Lives Matter-te pawh a awm phah hial a ni a ti. US chu mihring dikna chanvo humhalh tawk lo an nihna chu pawm turin Yang chuan US palaite chu a hrilh.

Insumdawn tawnna kawngah pawh China chu industry a subsidy chungchangah te, intellectual property bakah an ram currency a tihhlut duhlohna te chu thil dik tawk lo niin US chuan China palaite hi an hrilh a ni. South China Sea-a US lawng sipai ten an huang va dai tuma hmalakna an neih chu China chuan a duh loh thu sawiin, a ram bial chhunga inrawlh lo turin US chu a ngen.