Israel sorkar thar tur a la fel thei lo

Israel Prime Minister Benjamin Netan­yahu chuan ṭangrual sorkar thar siam turin party dangte inremna a la siampui thei lo. Member 120 awmna Israel Parliament, Knesset-ah hian sorkar siam turin member 60 tal neih phak a ngai dawn a ni. April thlaa Parliament inthlan an neihah khan Netanyahu kaihhruai Likud Party chu party mala seat la hnem ber a ni a, seat 35-a la. Netanyahu hian Jewish ultra-orthodox party-te leh nationalist party dangte nen ṭangrualin sorkar siam a tum a, member 65 an nei pha dawn a ni. Heng party-te hi inbiakna a neihpui mek a, mahse nimin thleng khan inremna an la siam thei lo. Netanyahu hian sorkar thar siam tur hian May 28 thleng hun a nei dawn a, hemi hma hi chuan inremna a siampui hman beisei a ni. Ṭangrual sorkar siampui tur party a biakte hian duh dan hrang hrang an neih avangin inremna hi an la siam thei lo a, mahse an hun tawp hmain an inbiak rem theih rin a ni. Pathianni-a cabinet meeting chuan PM Netanyahu-an PM in minister a ruat theih zat bithliah siam titawp tura a rawtna chu a pawmsak. PM hian ṭangrual sorkar siam turah minister tam zawk neih theih a duh a, hei hian an harsatna neih mek pawh a sutkian theih a beisei a ni. Tun dinhmunah chuan Israel hian minister 19 leh deputy minister pali a nei thei a ni. PM in minister neih theih zat tih­pun a rawtna hi cabinet-in a pawm­pui hnuah tunkar chhung hian Knesset-ah vote lak a ni ang.