Google-in Huawei company an thawhpuina an titawp ṭhen

United States(US) sorkarin Chinese company, Huawei chu blacklist-ah a telh tak avangin Google parent company, Alphabet chuan Huawei a thawhpuina ṭhenkhat a titawp. Huawei a thawhpuina a tihtawp zingah hian hardware leh software transfer te, technical service te a tel. Mahse Huawei smartphone hmang mek, Google apps neite chuan Goolge-in download apps update a dah chu an hmang thei dawn tih Google thupuangtu chuan a sawi. Huawei hrekna siam a nih vang hian company hian China pawn lamah Google Android operating system update theihna a hloh tawh dawn a, hei hian smartphone a hralh chhuah kawngah a nghawng pawi thei hle dawn a ni. Huawei smartphone thar, Android hmangte pawhin service lar tak tak Google Play Store, Gmail leh YouTube apps-te an hmang thei tawh dawn lo a ni. Huawei hian Android public version chauh a hmang thei dawn a ni. US President Donald Trump-a kaih­hruai sorkar chuan kar kalta Ningani khan Huawei Technologies Co Ltd. hi entity list-ah a dah. US company-te chu sorkar phalna nei lo chuan China company hnenah hian hmanruate an hralh khapsak an ni a, an thawhpuina kawngah khuahkhirhna khauh tak siam a ni tawh dawn a ni.