Bangladesh PM hlui dinhmun a ṭha lo

Bangladesh Prime Minister hlui, jail-a tang mek Khaleda Zia chu a hriselna dinhmun a ṭha lo hle tih Bangladesh Nationalist Party chuan a tarlang. Kum 73 mi, ṭum thum prime minister dinhmun lo chelh tawh Zia-i hi a tanna  hmun boruak ṭha lo avangin kar kal ta aṭang khan a hriselna a tlahniam hle tih BNP chuan a sawi a, chhuah zalen nghal tura an phut thu a tarlang bawk. BNP standing committee member Jamiruddin Sircar chuan a tanna hmun khawharthlak vang leh enkawlna ṭha a dawn loh avangin Zia-i hian lung na bakah natna hrang hrang a neih belh tih a sawi. PM hlui chu a duhna damdawiinah ngei enkawlna ṭha tak pek a nih theihna tura awm phalsak turin sorkar a ngen a, sorkar chuan Zia-i enkawlna tur chu a ruahmansak ang tih a lo tiam tawh chungin tun thlengin hmalakna engmah a awm lo a ni, a ti. Zia-i hi eiruk thubuai pahnihah thiam loh chantir a nih hnuin kum 10 tang tura hrem a ni a, nikum February thla aṭang khan kum 200 zet upa, Dhaka taninah dah a ni.