Indonesia President Joko Widodo thlang tling leh

Indonesia President Joko Widodo chu a term hnihna atan thlan nawn leh a ni. General Election Commi­ssion (KPU) chuan April 17-a inthlan result chu Thawhlehni khan a puang a, President Widodo, Jokowi tia hriat lar leh a vice-president Ma'ruf Amin-te chuan vote tla aṭanga 55.5% hmuin an khingpui, eptu pawl candidate Prabowo leh Sandiaga Uno-te an hneh a ni. Hetihlai hian eptu lam chuan official result, Nilainia puan tura tih chu election commission-in Thawhlehnia a puan avangin an pawm lo tih an sawi. Prabowo-a campaign team member, Azis Subekti chuan inbumna awm chu an duh lo tih sawiin, hei hi democracy palzutna nia an ngaih thu a sawi. Official result hi Constitutional Court-ah khin let an tum thu a sawi bawk. Electoral law hnuaiah complaint thehlut tur hian ni thum hun an nei a ni. Inthlan result tihchhuah a nih hma pawhin kum 57 mi, Widodo hi tling tura rin kai zawk a ni. Mahse kum 67 mi, Parbowo chuan inthlanah hian vote tihchingpenna a thleng nasa tih a sawi thung a, lungawi lohna lantira nawrhna lian tham tak huaihawtna pawh a thleng mai thei tih a sawi. Kum 2014-a president thlannaah khan Prabowo hian Widodo hi a lo hneh zo lo tawh bawk a, hemi ṭum pawh hian court-ah a khing a, mahse court-ah pawh a chak lo leh tho a ni. KPU-in inthlan result a tihchhuahah Widodo hian April 17-a inthlana vote tla, vote maktaduai 154 aṭangin vote maktaduai 85 chuang a hmu a ni. Hemi ni veka Parliament inthlanah Widodo party, Indonesian Democratic Party of Struggle (PDI-P) hian hnehna a chang bawk. Indonesia hian April 17 khan ṭum khata democracy rama inthlan lian ber a nei a ni. A rualin president, parliament leh legislative inthlan buatsaih a ni a, heng inthlan hrang hrangah hian candidate pawh 2,45,000 zet an awm.