Security Council-in Russia ngenna a hnawl
United Nations Security Council chuan Russia-in Ukraine language law chungchang sawiho a rawtna chu a hnawlsak. UNSC member-ten Russia ngenna chungchang an ngaihtuahah, member 15 zinga panga chauhin an thlawp a ni. Security Council agenda item-a telh tur chuan vote pakua chin tal hmuh a ngai a ni. Russia ngenna thlen hi France, Germany, United States, Poland, Britain leh Belgium in an thlawp lo a, vote laknaah hian member pali an hai bawk. France ambassador Francois Delattre chuan Russia ngenna thlen hi Russia-Ukraine buaina chinfelna atana thil ṭangkai a ni lo a, Ukraine President thar Volodymyr Zelensky dinhmun pawh a tih harsat phah thei dawn a ni, a ti. Hetih lai hian Russia ambassador Vassily Nebenzia chuan meeting nei tura an ngenna chhan hi sawifiahin, Ukraine law siam thar chuan Security Council-in a lo pawmpui tawh, Minsk Agreement a palzut a ni, a ti. China chuan Russia hi a thlawp thung a, Security Council-in a ngenna a hnawlsak chu pawi a tih thu a sawi. Ukraine Parliament chuan April 25 khan Ukrainian language bill hi a pawm a, President kalchhuak ta Petro Poroshenko chuan law-a chantir turin a hming a sign hnan tawh bawk. He dan hnuaiah hian Ukrainian chu official language-ah puan a ni a, public sector-ah pawh hmang vek tura tih a ni.