Ukraine President tharin Parliament a ṭhiat

Ukraine President thar Volodymyr Zelenskiy chu Thawhṭanni khan rinawmna thu tiamtira lakluh a ni a, lakluh a nih hnuah President thar chuan inthlan buatsaih a nih theihna turin Parliament a ṭhiat nghal. Comedian lar tak ni ṭhin, President thar Zelen­skiy chuan lakluh a nih hnua thu a sawiah thla hnih chhungin Parliament inthlan buatsaih a nih tur thu a sawi. Legislator-te chu eiruk dona tur dan siam turin a sawm nghal bawk. Kum 41 mi, Zelenskiy hian politics lamah tawn­hriat la nei lo mah se, April thlaa Ukraine presi­dent thar thlannaah khan vote 73% zet hmuin president ṭanglai Petro Poroshenko chu a hneh a ni. President thar chuan an ram inrelbawl danah inthlak danglamna nasa tak thlentir a tum tih a sawi a, insiamṭhat duh lo minister leh sorkar official-te chu bang mai turin a ti nghal bawk. Cabinet hruaitute leh official dangte pawh an office bangah a thlalak tar lo turin a ngen. "In office-a ka thlalak tar chu ka duh lo tak zet a ni. President hi icon emaw, idol emaw a ni lo. President thlalak ni loin in fate thlalakte tar zawk ula, thutlukna pawimawh in siam apiangin in fate thlalak chu in en ṭhin dawn a nia," a ti.