Rohingya refugee camp kangah mi 7 an thi

Bangladesh-a Cox's Bazar district-a Rohingya Muslim raltlante awmna Balukhai camp-ah Thawhṭanni khan kangmei nasa tak a chhuak a, mi pasarih an thi.Police official, Zakir Hossain Khan chuan refugee camp-a kangmei chhuah dan hi hriat chian a la ni lo tih sawiin, an chhui mek thu a sawi. Mi pasarih an thi tih hriatchian a ni tawh thu sawiin, an zingah hian naupang pathum an tel a ni. Bangladesh-a International Federa­tion of Red Cross and Red Crescent Societies (IFRC) hotu Sanjeev Kafley chuan kangmei chhuakah hian raltlan awmna in 17,000 chuang zet a kan chhiat thu sawiin, mi sing tel chu awmna nei loin an awm mek a ni, a ti. Raltlante chenna hmun bakah health centre, distribution point leh facility dang eng emaw zat a kang tel bawk. Refugee camp-a section paliah kangmei hi a chhuak a, darkar li hnu velah an ṭhelh mit thei chauh a ni. Kangmei chhuahna, Cox's Bazar-a refugee camp-ah hian mi maktaduai khat chuang an la awm mek nia sawi a ni. Kangmei chhuah vanga camp-a awm mi tam tak tlanchhiat tum chu barded wire hmanga camp hi hung tlat a nih avangin an tangkhang bakah hliamte an tawrh phah nia sawi a ni a, hei vang hian international humanitarian agency-te chuan camp hungna hi paih turin thuneitute an ngen. Humanitarian organization Refugees International chuan kangmei chhuakin thil a tihchhiat dan tak hi hun eng emaw chen chu hriatchian mai a har dawn niin an sawi a, he chhiatna thleng avang hian mi 50,000 vel chuan awmna an neih loh phah dawn tih a sawi. Nimin thleng khan chin hriat lohin naupang eng emaw an la awm niin a sawi bawk. Kumin January thla khan Cox's Bazar-a refugee camp hi a lo kang tawh bawk a, raltlante awmna 550 chuang kangin, mi 3,500 vel chu chenna hmun nei loin an awm phah tawh bawk.