US-a inpawngkahna thlengah mi 10 an thi
US-a Colorado state-ah an ram huna Thawhṭanni khan inpawngkahna a thleng leh a, mi 10 an thi. Thi zingah hian police officer pakhat a tel. State capital, Denver hmarthlang lam, km 50 vela hla, Boulder khuaa supermarket-ah inkahna hi thlengin, pawikhawihtu nia sawi hi police-te chuan an man tawh a, mahse a hming leh nihna kimchang erawh an la puangzar lo. King Soopers supermaket, Table Mesa area-a inpawngkahna thlen hun hi an ram huna Thawhṭanni tlai dar 3 vel a ni a, pawikhawihtu hi supermaket-ah hian kalin a chhunga awmte chu a pawng kah zui nghal a ni. Pawikhawihna thlenna hmunah Boulder police-te chu kalin, supermarket hi an hual nghal a, silai hmehpuaktu nia sawi hi kap hliamin an man zui nia sawi a ni. Colorado governor Jared Polis chuan pawikhawihna thleng chu a dem tak zet tih sawiin, thi chhungte leh state mipuite a tawrhpui thu a sawi. He state-ah hian kum 2012 khan Aurora-a movie theater-ah mi pakhatin silai a pawng kah a, mi 12 a lo kaphlum tawh bawk. Pawikhawihtu hi damchhung tang tura hrem a ni. Kum 1999 khan mipa naupang pahnihin Colukbine High School-ah an classmate 12 leh zirtirtu pakhat an lo kaphlum tawh bawk. Kar liam ta khan Georgia state-a spa dawr hrang hranga inkahna thlengah mi pariat kahhlum an lo ni tawh bawk a, thi zingah paruk chu Asia mi an ni.