Indonesia Inthlan result-a lungawi loten nawrh huaihawt

Indonesia ram inthlan result chu Thawhlehni khan puan a ni a, President atana Joko Widodo thlan nawn a nih vanga lungawi loin nimin khan an ram khawpui, Jakarta-ah mi eng emaw zatin nawrh an huaihawt. Nawrh huaihawtnaa buaina chhuakah mi paruk an thi a, midang 200 in hliam an tuar. 

Thawhlehni zan aṭanga nimin zing thleng khan nawrh hi huaihawt a ni a, Elections Supervisory Agency leh Election Commission head­quarters bulah an pungkhawm a ni. A tirah chuan boruak muanawm tak hnuaiah nawrh hi huaihawt a ni a, mahse a hnuah pungkhawm zinga ṭhenkhat chuan tharum thawhin car-te an hal a, halpuahin police-te an vawm bawk. Hei vang hian police-te chuan pungkhawmte hnawh­darh nan hian tear gas an hmang a ni. 

Police thupuangtu M Iqbal chuan tharum thawhna thlenga inhnamhnawih mi 69 man an nih thu a sawi. General Election Commission chuan Thawhlehni khan inthlan result  hi a tichhuak a, president atan Widodo chu thlan nawn leh a ni a, parliament leh legislative inthlanah pawh an party an chak a ni. President Widodo hian a khingpui, eptu candidate Prabowo Subianto a hneh a, kum 2014 inthlanah pawh a lo hneh tawh a ni. Mahse Subianto chuan inthlan result hi a pawm lo tih a sawi a, result puan a nih hnu lawkah Subianto thlawptu mi tam tak chu election body building bulah pungkhawmin lungawi lohna an lantir nghal a ni. Eptute chuan court-ah zualko an tum tih an sawi. 

Eptu lamten lungawi lohna an lantir avang hian election body pahnih headquarters hi police officer 32,000 zetin an veng zui a ni. National Police thupuangtu Dedi Prasetyo chuan ramchhung hmun dang aṭanga nawrh huaihawt tura Jakarta-a kal, mi 1,300 vel zet chu nawrh chhunzawm zel tumin mosque-ahte an awm tih a sawi.