DR Congo Prime Minister thar tur ruat

Democratic Republic of the Congo (DRC) prime minister thar atan Sylvestre Ilunga Ilukamba ruat a ni. President Felix Tshisekedi thupuangtu Kasongo Mweme Yambayama chuan prime minister thar atan Ilukamba ruat a nih thu hi a puang a ni.

Ilumkamba hi President Tshisekedi leh president  kalchhuak Joseph Kabila-ten inremna an siam anga ruat a nih thu a sawi bawk. Ilukamba hi a hmain DRC national railway company hotu a lo ni tawh a ni. Presi­dent hlui Mobutu Sese Seko hnuaiah finance minister a ni tawh bawk a ni. Nikum December 30-a president thlanna neihah Tshisekedi hian hnehna a chang a, mahse inthlan buaipuitute chuan inthlanah hian thil fel fai tawk lo a awm tih an sawi a, eptute pawhin vote tihchingpen a ni tih an sawi bawk.  

Tshisekedi hian inthlanah hian president hlui Kabila-an candidate atana a thlan Emmanuel Ramazani Shadary leh eptu pawl candidate Martin Fayulu-te a hneh a ni. Fayulu hi vote hmu sang ber dawttu a ni a, mahse inthlan result hi a pawm lo a, hnehna a chan lohna turin Tshisekedi leh Kabila-te chu a ruka in­remna siamah a puh a ni. Mahse he puhna hi Tshisekedi leh Kabila-te chuan an pha ve ve thung. President atana lakluh a nih hnuah Tshisekedi hian tang 700 zet a ngaidam tawh a ni.