Myanmar sipaiten hmeichhe naupang kum 7 mi an kaphlum

Myanmar sipai rorelna dodaltute dapa beihpui an thlaknaah Mandalay khawpuai sipaite silai hmehpuahah hmeichhe naupang kum sarih mi a thi a, sipai kut tuara thi zingah naupang ber a ni. 

Thawhlehni khan sipaite hian he hmeichhe naupang, Khin Myo Chit te chenna in hi an luhkhung a, a pa kahhlum tuma silai an hmehpuah lai tak hian hmeichhe naupang hi a pa inpawm tir tumin a pan a, amah zawk hi an kap fuh ta a ni. Khin Myo Chit-i pa hi sipaite hian a inah mi thuruk a nei em tih an zawt a, midang  an awm lo tih a sawi chu dawt sawiah puhin silai hi an hmetpuak nghal nia sawi a ni.

Hemi ni vek hian Mandalay khawpuiah sipaite hian mi dang pahnih an  kaphlum bawk. Thawhṭanni khan Mandalay-ah hian mipa rawlthar pakhat, kum 14 mi chu an in chhunga a awm lai sipaiten an lo kaphlum tawh bawk. Sipai sorkar chuan democracy phuta nawrh huaihawtte chu tharum thawhna thlen leh, in halahte an puh a, nawrh huaihawtte thunun an nih theihna atan theihtawpa inthunun chungin hma an la niin an sawi.

Sipai sorkar thupuangtu, Zaw Min Tun chuan February 1-a sipai sorkar a din hnua ram chhung hmun hrang hranga nawrh huaihawt leh sipaite innawrnaah nawrh huaihawt zinga mi 164 an thi tawh niin a sawi a, mahse activist-te rawh chuan sipaite kut tuara thi mi 275 an tling tawh tih an sawi thung. Mipui sorkar dah let leh phutin khawpui hrang hrangah nawrh huaihawt chhunzawm reng a ni a, nimin aṭang khan nawrh huaihawtte chuan 'silent strike' an nei ṭan. Hei hi civil disobedience movement-in mipuite nunna dinhmun derthawnga dah loh nawrh huaihawt dan kalphung thar a ruahman a ni. Dawr leh sumdawnna hmunte khar niin, kawhthlerah mipui leh motor  chhuak pawh an tlem hle. 

Sipaiten media mite vau
Thawhlehni khan sipai sorkar thupuangtu, Zaw Min Tun chuan news conference neiin, media mite chu thudik tawk lo thehdarh leh, buaina tipunlun tuah a puh. Sipaiten civil sorkar thuneihna an hnehchhuh hnua Parliament member paihthlakten an din, Committee Representing Pyi­daungsu Hluttaw (CRPH) chu be pawp lo turin media mite chu Zaw Min Tun chuan a vau bawk a, an be pawp a nih chuan thubuai siamsak theih an ni ang, a ti. 

Sipai sorkar hian CRPH hi dan kalha pawl dinah a lo puang tawh a, he pawl member-te chu thi tura hremna thlenga pek theih an nih thu a sawi. Darkar thum chuang press conference a neihnaah, Zaw Min Tun chuan nikum inthlanpui neihah khan Aung San Suu Kyi-i party, National League for Democracy (NLD) chu vote tichingpenah puh nawn lehin, ballot paper tam tham tak an siam belh a, Suu Kyi-i dinna bial ngeiah pawh voter tam tak an siamchawp a ni, a ti.

Mahse hei hi NLD chuan chhang nghalin, inthlanah vote an tihchingpen loh thu leh, dik taka thlan tlin an nih thu an sawi a ni. Suu Kyi hi February-1 a civil sorkar paihthlak a nih hnuah sipaite hian manin an la hreng zui a, thubuai pawh siam belh sak zel a ni. Suu Kyi-i hi nimin khan court-ah vidoe conference hmanga inlan tura tih a ni. A hmaa court-a a inlan tur chu internet service awm loh avangin a  lo inlan thei tawh lo a ni. 

Tang ṭhenkhat chhuah an ni
Sipaite chuan nimin khan nawrh huaihawt vanga an man mi eng emaw zat an chhuah. Yangon-a Insein jail aṭangin tang eng emaw zat chu nimin khan bus hmangin phur chhuah an ni a, eng zat chiah nge chhuah an nih chu thuneitute chuan an puangzar lo.

Mita hmutute chuan jail aṭanga chhuahte hi bus 15 hmanga phurh chhuah an nih thu leh, mi 600 vel an nih thu an sawi a, an zinga a tam zawk chu university zirlai an ni. Assistance Assocation for Political Prisoners (AAPP) activist group chuan sipaiten nawrh huaihawtte laka beihpui an thlak hnuah mi 2,682 man an ni tawh tih a sawi. An zingah chuan nawrh huaihawtnaa tel lo, zan lama thil lei tura chhuakte an mante pawh an tel a ni.