European elections 2019: UK hmun hrang hrangah inthlanna nei

European Parlia­ment election 2019 chu nimin khan United Kingdom hmun hrang hrangah neih a ni. UK hian member 73 an nei a, hengte hi Member of the European Par­liament (MEP) tia sawi an ni. Heng member 73 turte hi England-a constituency pakuaah te, Scotland, Wales leh Northern Ireland constituency pakhat ṭheuhahte thlanna an nei.

EU parliament in­thlanna hi nimin aṭang khan neih ṭan a ni a, ni thum chhung a awh ang. Netherlands pawhin nimin khan inthlanna hi an nei ve bawk a, mipui cheng tam dan a zirin MEP hi region hrang hrangin an nei thei a ni.

EU ram zawng zawngin in­thlan­na hi an neih zawh hnuah result hi puan a ni dawn a, Pa­thianni hian inthlanna hi neih zawh hman beisei a ni bawk.         Kum 18 tling chinten vote an thlak thei a, EU ram zinga mi an nih chuan ram danga awm pawh nise vote hi an thlak thei a ni. UK bikah hi chuan UK-a cheng ngei an nih a ngai thung.

Czech Republic, Latvia, Malta leh Slovakia-te chuan naktuk hian inthlanna an nei ve dawn  thung a, a la bang EU ram dang zawngte chuan Pathianniah inthlanna an nei leh dawn a ni.