Panasonic-in Huawei nena an indawrna titawp lailawk
Japan company Panasonic chuan thuchhuah siamin Huawei nena an indawrna chu US in hrekna a siam avangin an titawp lailawk tih an tarlang.
Panasonic chuan Huawei leh a zawmpui peng 68-te US in hrekna a siamte nena indawrna an neih ṭhin chu an titawp rih dawn tih an tarlang a ni. US hian kar hmasa khan Huwaei hi a blacklist zingah a telh a, America firm-te chu license an nei a nih loh chuan Huawei nena an indawr hi a khapsak. US hian Huawei technology hi an security enthlaknaa hman a nih an rinhlelh avangin an khap a ni.
US in a khap hnu lawk hian Google pawhin Huawei chu Android operating system update a khapsak ve nghal bawk a, Huawei smartphone chhuak tharte chuan Google apps ṭhenkhat an hmang thei tawh dawn lo tihna a ni. UK-a hmunpui nei chip designer ARM pawhin a staff-te chu Huawei nena an indawrna titawp turin an hriattir ve nghal bawk.
Huawei erawh chuan US puhna hi an pha a, China sorkar nen inzawmna an nei lo tih an sawi thung.