Sri Lanka President-in emergency pawtsei

Sri Lanka President Maithripala Sirisena chuan an ram puma emergency puan chu thla khat atan a pawtsei. 

April 21-a biak-in pathum leh luxury hotel pathuma thihchilh bomb tihpuah vanga mi 258 zetin nunna an chan avangin President hian April 23 khan emergency hi a puang a ni. Emergency law hnuaiah hian police leh sipaite chuan court thupek nghak kher loin pawikhawihnaa inhnamhnawiha rinhlelhte man leh hreng turin thuneihna an nei a ni. 

Sri Lanka rama Easter Sunday-a pawikhawihna thleng hi Islamic State (IS) firfiak pawl chuan an tih a nih thu an sawi a, mahse sorkar chuan tualchhunga Islamist firfiak pawl, National Thawheed Jammath (NTJ)-te tihah a puh thung. He pawikhawihna thleng vang hian ramchhung hmun ṭhenkhatah Muslim-te beihna a thlen phah a ni. 

Police-te chuan pawikhawihna thleng kaihhnawihah hian rinhlelh thilah mi 80 chuang an man tawh tih an sawi.