Britain PM May-in A ban thu a puang

Britain Prime Minister Theresa May-i chuan nimin khan prime minister a nihna aṭanga a ban thu a puang. 

Theresa May-i chuan June 7-a amah thlaktu tur, Conservative Party hruaitu thlan a nih hma chuan prime minister dinhmun hi a la chelh chhunzawm rih tur thu a sawi nghal bawk. Prime Minister dinhmun hi kum thum a chelh hman a ni. 

European Union aṭanga Britain inlak hranna tura May-i leh EU hruaituten inremna an siam, Withdrawal Agreement chu Britain Parliament chuan ṭum thum zet a lo  hnawlsak tawh a, May-i party MP te ngei pawhin a Brexit plan hi an sawisel a ni. 

Thla ruk chhung zet Brexit deal chungchang a buaipuina a hlawhchham hnuah, May-i chuan hruaitu thar kaihhruaina hnuaiah hma lak a ngai tih pawmin, PM aṭang hian a bang ta a ni. A ban thu a puan hian amah pawh a lungchhe hle. Downing Street-a thuthar thehdarhtute hmaa thu a sawiah, May-i chuan Brexit a tihhlawhtling thei lo tur chu pawi a ti kumkhua tawh dawn tih  a sawi.