Hmelmaten min bomb mah se kan tlawm ngai dawn lo: Iran President

Iran President Hassan Rouhani chuan ram dang, a bikin US hrekna avangin Iran mipuite chu an tlawm dawn lo tih a sawi a, an hmelmaten an ram chu bomb pawh ni se an tlawm mai dawn lo tih a sawi.

 
President Rouhani chuan US nawrna avanga kunhniam mai an tum loh thu leh, beih an tawk a nih pawhin an thil tum chu an thlahthlam mai dawn loh thu a sawi. Hemi hma hian Iran sipai hotu pawhin Iran leh US inkara inepna awm mek chungchang chu a lo sawichhuak tawh bawk a, hmelmaten an nawr lui a nih chuan na taka chhan let an nih tur thute a lo sawilang tawh a ni. 

Kum 2015-a Iran leh world power ram parukten nuclear deal an lo siam tawh aṭangin US chu nikum khan a inhnukdawk a, hemi hnu hian US President Donald Trump chuan Iran hreknate hi siam chhunzawm lehin, thla hmasa khan ram dangte pawh Iran oil lei tawh lo turin a ti a, an lei lui a nih chuan US lak aṭangin hrekna an tawh tur thu a sawi. 

Ram pahnihte hi ṭawngkamin na tak takin an inbei zui reng a, President Trump hian a twitter-ah US vau lo turin Iran a hriattir a, indo an duh a nih chuan Iran tawpna tur a nih thute pawh a lo sawi lang tawh a ni. Ningani khan Pentagon acting chief Patrick Shanahan chuan Iran nena an inkar boruak ṭha lo chho zel vangin Middle East-a America sipai dah belh chungchang ngaihtuah a nih thu a sawi.