SAfrica President thar lalut

South Africa President thar Cyril Ramaphosa chu kar kalta Inrinni khan rinawmna thu tiam tira lakluh a ni. 

President thar lakluh inkhawm hi an ram khawpui, Pretoria-ah neih a ni a, mi 30,000 vel zet an pungkhawm. Hruaitu thar lakluh inkhawm hi ramdang 40 chuang hruaituten an hmanpui a, an zingah hian  Democratic Republic of Congo, Zimbabwe leh Mozambique ram hruaitute pawh an tel. 

Cyril Ramphosa-a party, African National Congress (ANC) hian inthlanpui an neih zawh takah vote 57.5% hmuin hnehna an chang leh a ni. Kum 1994 aṭanga thuneihna changtu, ANC hi inthlanpuia an chet chhiat ber ṭum a ni. Kum 66 mi, President Ramaphosa chuan lakluh a nih hnua thu a sawiah, an ram tan kawl a eng dawn tih a sawi a, ram siamṭha a, bung thara kaipui a tiam. Ramaphosa chuan, "Kan ramin chona kan hmachhawn mek hi a lianin a hautak hle a ni. Mahse hengte hi chinfel theih loh an awm lo. Kan harsatna tawh mekte hi chinfel a ni ngei ang tih ka tiam e," tiin a sawi. Mingote rorelna hnuaia an awm titawptu, democracy kalphung anga South Africa president atana thlan tlin hmasak ber, Nelson Mandela zahna a hlan nghal bawk. 

Ramaphosa hi eiruknaa in­hnamhnawiha puha president hlui Jacob Zuma bang tura nawr luih a nih hnuah, nikum khan President atan dah a ni. Eiruk chungchanga Zuma hming­chhiatna hian an party, ANC hming pawh a tihchhiat phah hle a, hei vang hian kumin inthlanah pawh kum dang an pha lo hle a ni. Inrinnia president thar lakluhnaah hian Jacob Zuma hi a tel ve lo a ni. Zuma hian eiruk thubuai a nei mek a, Zirtawpni khan Petermaritzburg khuaa court-ah a inlan a ni.