US President-in Japan a tlawh

United States President Donald Trump chu ni li cham turin kar kalta Inrinni khan Japan ramah a zin.

President Donald Trump hian Japan Prime Minister Shinzo Abe hmuin, ram pahnihte inlaichinna ṭha zawk siam dan turte an sawi dun. Nimin khan 'summer 'basho', Summer Grand Sumo Tournament final a hmanpui a, vawiin hian Japan lal thar, Emperor Naruhito a hmu ang.  

Japan pana a chhuah hmain, Trump chuan kum 200 chuang chhunga Japan rama event lian bera khual zahawma sawm a ni chu lawmawm a tih thu a sawi. Nimina Summer Grand Sumo Tournament-a hnehna changtu hnenah "Trump Award" a hlan a ni. Japan PM Abe hi US aṭanga a hawna a la rei lo hle a, Trump pawh hian Japan khawthlang lam, Osaka khuaa Group of 20 summit hmang turin thla tharah Japan hi a tlawh leh dawn a ni. 

President Trump leh PM Abe-te hi an inpawh ṭha hle a, golf-te pawh an khel dun fo a ni. Trump-a a president hnu hian  telephone leh hmaichhanah ṭum 40 chuang an inbe tawh a ni. US president hian Nobel Peace Prize dawng turin Abe hian a nominate tih pawh a sawi a, mahse hemi chungchang hi Japan sorkar chuan engmah a sawifiah lo thung.