Mount Everest lawn chhuah tum mi 10 an thi tawh

Kumin chhungin khawvela tlang sang ber, Mount Everest lawn chhuah tuma thawk chhuak zingah mi 10 an thi tawh. 

Kar kalta Inrinni khan British tlang lawn mi, Robin Hayes Fisher chu tlang chhip a lawn chhuah hnua a kir lam, meter 8,700 vela sanga a awm laiin a chau a, a thi a ni. Ani nen hian tlang lawn mi 10 zet an thi tawh a ni. Nikum chhung khan mi panga an lo thi tawh bawk. 
Mount Everest lawn chhuah tumte tan climbing season a nih vangin tlang lawn tura kal an tam hle.

Peak Promotion managing director chuan tlang lawn tura kal an tam avangin Camp IV aṭanga tlang chhip panna chu an tawt phah hle tih a sawi a, team tam tak chuan tlang chhip thleng tur hian darkar eng emaw zat an nghahte a ngaih phah a ni, a ti. 

Kum 1953 khan New Zealand mi Sir Edmund Hillary leh Sherpa Ten­zing Norgay-te chuan a hmasa ber atan Mount Everest tlang chhip hi an lawn chhuak a, hemi hnu hian mi 5,000 dawnin khawvela tlang sang ber hi an lawn chhuak tawh a ni.