US-Mexico border aṭanga pem lut chungchang Vice President Kamala Harris kutah dah

US-Mexico border aṭanga US-a pem lut an pun chak tak em avangin president Joe Biden chuan Mexico ramri kal­tlanga lutte thununna kawnga mawhphurhna chu vice president Kamala Harris kutah a dah. 

Biden chuan Vice President hnena mawhphurhna a pek chu hna hautak tak a ni dawn tih a sawi a, mahse he mawhphurhna kengkawh tur hian California attorney general hlui, Kamala Harris hi a tling ber a ni, a ti. Joe Biden-a'n US President office a luah aṭang khan Mexico lam aṭanga pem lut hi an pung chak hle a, an zingah hian naupang kum tlinglo, an chhungte tel loa an luh avanga immigration detention facility-a awmte pawh an tel a ni. 

President hlui Donald Trump-a hun lai  khan kum tling lo, chhungte puitling hruaitu nei lo, ramri kan tumte chu detention facility-ah dah an ni ṭhin. Mahse Biden-a President-na hnuaiah he policy hi titawpin, kum tlinglo pawh ramri an kan phalsak an ni a, US-ah sponsor-tu chhungkuate hnenah te dah an ni ṭhin. Hei vang hian kum tling lo pem lut pawh hi an pun phah nasa hle nia sawi a ni. 

Donald Trump-a'n immigra­tion policy a lo siam tawh chu President thar hian January thlaa office a luah khan a sut nghal a, Trump-a thupek anga Mexico ramri hungna siam hna thawh mek pawh a titawp nghal a ni. Hei vang hian dan loa US-a lut pawh an pung chak hle niin sawiseltu lam chuan an sawi. Biden chuan Trump-a'n a lo titawp tawh, legal immigration programme pawh ennawn a ni dawn tih a sawi. 

February thla khan US Custom official-te chuan chhim lam ramri kaltlanga an rama lut mi 1,00,000 chuang an awm tih sawiin, January thla aia lut an punna hi 28% a tling pha a ni. Pem lut zinga a tam ber hi Central America aṭanga kal, retheihna leh tualchhung buaina vanga tlanchhiate an ni.