US-in Myanmar sipai company-te blacklist-ah telh dawn
US Treasury chuan Myanmar sipai thununna hnuaia awm company pahnih, Myanmar Economic Corporation (MEC) leh Myanmar Economic Holdings Ltd (MEHL) te chu blacklist-ah telhin a hrek dawn.
Heng company pahnihten US-a an thil neihte chu khawih chet theih lohin hrek sak an ni dawn a, hei hi civil sorkar paihthlak a ni leh, nawrh huaihawtte chungah sipaite chet dan an duh lohna lantirna a ni. February 1-a sipaiten civil sorkar thuneihna an hnehchhuh hnuah, February 11 khan US president Joe Biden chuan Myanmar hrekna tur thupek hi a lo tichhuak tawh a, Myanmar central bank-in New York Federal Reserve-ah USD tluklehdingawn khat a neih chu khawih chet theih loha hrek a ni. Sipaite hian thuneihna an chan hnuah he sum hi lakchhuah an tum a, mahse US hian a lo hreksak hman a ni.
US bakah Britain, Europrean Union leh Canada ramte chuan Myanmar sipai hotu ṭhenkhatte hrekna hi an lo siam tawh bawk a, an zingah hian sipai hotu lu ber, commander-in-chief Min Aung Hlaing bakah a fate pawh an tel. Myanmar sipaite hian an rama firm lian leh an hnuaia mi tam zawk chu an thunun a, sum lakluhna atan an hmang a ni. Sipai rorelna duh lotu activist-te chuan sipaite sum hmuhnate hi hrek beh sak zel turin ram dangte an ngen a, sorkarin sum hmuhna atana a hman ber, oil leh gas project-te pawh hrek sak turin an ngen a ni.
Nawrh huaihawt chhunzawm leh
Nilaini khan sipai rorelna duh lohna ram pumah lantirin silent strike neih a ni a, pawn lamah tumah chhuak loin sumdawnna leh hmun dangte pawh khar a ni. Niminah erawh chuan Yangon leh khawpui dang dangah kawtthlerah lungawi lohna lantir chhunzawm leh a ni.
Mawlamyine-ah chuan pungkhawmte chu police-te hnawtdarhin an zinga 20 an man a, mi pahnihin hliam an tuar bawk. Khawpui dangah erawh chuan buaina lian tham chhuak leh, hliam tuar an awm hriat a ni lo.