NKorea-in ballistic missile pahnih en chhin

North Korea chuan  ballistic missile pahnih a enchhin a, hengte hi Sea of Japan-ah an tla niin nimin khan US leh Japan chuan an sawi. 

UN Security Council resolution hnuaiah North Korea hi ballistic missile a enchhin khap a ni. Sea of Japan-a ballistic missile pahnih a enchhin hma, kar liam ta khan North Korea hian non-ballistic missile pahnih chu Yellow Sea-ah a lo enchhin tawh bawk nia sawi a ni. 
Japan official-te chuan nimina NKorea-in missile pahnih a kahchhuah hun hi an ram huna zing lam dar 7 niin an sawi a, km 420 leh 430-a thui an thlawh hnuah tuipuiah an tla. 

NKorea thiltih hi Japan leh US chuan an dem thu an sawi nghal. Japan prime minister Yoshihide Suga chuan NKorea thiltih hi an ram bial himna tiderthawng thei thil leh, UN resolution bawhchhiatna lian tak a ni, a ti. US Indo-Pacific command spokesperson Capt. Mike Kafka pawhin thil awmdan chu ulak taka an thlithlai mek thu a sawi bawk. 

North Korea hian kum  khat dawn hnu leh, US President thar Joe Biden-a'n office a luah hnua ballitistic missile a enchhin lehna hmasa ber a ni. President Biden kaihhruai US sorkar hian North Korea policy a ennawn mek  a ni.