Germany-in Easter lockdown sut leh

Germany chancellor Angela Merkel chuan April 1-5 chhunga hripui leng vanga an rama Easter lockdown khauh tak puan a ni dawn tih a sawi tukah, he thutlukna hi sut a nih thu a sawi leh nghal. 

Thawhṭanni zan khan regional leader hrang hrangte nena inbiakna an neih hnuah, Easter lockdown khauh tak neih hi relin, Thawhlehni khan an puang  nghal a ni. Mahse Nilainia crisis meeting neihah he thutlukna an lo siam tawh hi an sut leh nghal a ni.  Angela Merkel chuan Easter lockdown siam tum chu an tihsual a ni tih sawiin, thupek sut a nih leh chungchangah mawhphurhna a lak vek thu a sawi nghal. 

Sorkarin ruahmanna a lo siam hmasak, Easter lockdown puan tur hi an rama lockdown khauh ber tura tih a ni a, dawrte khar vek tura tih niin punkhawm khap a ni bawk. Ni nga chhung chu mipuite pawh in lamah tawm vek turin an ti a, sakhaw thila punkhawm pawh khap a ni bawk. 

Mahse he ruahmanna hi mipui, a bikin sumdawngten nasa takin an sawisel a, hemi hnu hian sorkar chuan thupek hi a sut leh ta a ni. Merkel-i chuan, "Keima tihsual liau liau a ni a, he thil hian mipuite a lo tichiai hle a, hei vang hian mipuite hnenah ngaihdam ka dil a ni," a ti. Lockdown puan an tumna chu chhan ṭha nei ni mah se, hun tepter tawh takah kalpui mai chi a lo ni lo, tiin a sawi.