Israel PM-in ṭangrual sorkar din theih ngei a inring
Israel Prime Minister Benjamin Netanyahu chuan sorkar din tura an hun neih chu tawp dawn hnai tawh mah se, hun pek chhung hian political party dangte nen ṭangrual sorkar an din theih ngei a la ring tih a sawi.
April 9-a inthlanpui an neihah Netanyahu-a party, Likud Party chu party mala seat la hnem ber ni mah se sorkar siam turin member a ngah tawk lo a, party dangte a thawhpui a ngai dawn a ni. Sorkar thar siam tur hian Nilaini thleng hun an la nei a, Netanyahu hian party dangte inbiakna neihpui mah se tun thlengin inremna an la siam thei lo.
Hun tiam chhunga sorkar siam thei an awm loh chuan inthlan ṭhat leh a ngai dawn a ni. Netanyahu chuan, "Hun tiam chhungin kan harsatna hi kan chinfel theih ngei ka beisei a, hei hi mipuite duhdan pawh a nih ka ring a ni. Reilote inkar dan lekah inthlan neih hi kan ram tan hian a ṭha ber lo a, hetihlai hian hemi duh tlat hi an awm ve thei tho a ni," a ti.
PM Netanyahu hian ṭangrual sorkar siam tur hian Avigdor Lieberman-a party, Yisrael Beitenu party leh ultra-Orthodox party-te a thawhpui a ngai dawn a ni. Heng party-te nen hian Likud party kaihhruai hian seat 120 awmna parliament-ah seat 65 an nei thei dawn a ni.