Rohingya mite thah vanga Myanmar sipai mante chhuah zalen

Myanmar sorkar chuan kum 2017-a sipaiten Rakhine state-a beihpui an thlak ṭuma Rohingya Muslim mi 10-te thah an nih vanga sipai pasarih a mante chu kum khat pawh an tan hmain a chhuah zalen leh. 

Inn Din thingtlang khuaa Rohingya mite thah vanga kum 10 tang tura hrem sipaite hi nikum November thla khan chhuah an ni leh nghal tih an tanna hmuna tangte chuan an sawi. Kum 10 tang tura hrem ni mah se kum khat pawh jail an tang tling hman lo a ni. 
Rakhine-a Sittwe Prison chief warden leh senior prison official chuan thiam loh chantir sipaite hi hun eng emaw chen aṭang khan jail-ah an awm tawh lo tih an sawi. Official chuan sipaite hnena hremna pek hi sipai hotute chuan an tihnep sak tih a sawi.

Hemi chungchang hi sipai thupuangtu Zaw Min Tu leh Tun Tun Nyi-te chuan an sawifiah duh lo. Kum 2017-a Myanmar sipaiten Rakhine state-a beihpui an thlak avang hian Rohingya Muslim nuai sarih chuang chu Bangladesh ramah an tlanchhia a ni. He thil thleng chungchangah hian ram hrang hrangten sipaite chet dan hi nasa takin dem mah se, sipai pasarihte chauh hi hremna pek an la ni. 

Myanmar sorkar chuan Rohingya Muslim-te chungchangah tihsual engmah a nei lo tih a sawi a, official-te chuan sipai pasarih man an ni hian security force-te hunhim tlat nia sawi chu a dik loh zia a tilang a ni, a ti. Commander-in-chief Senior General Min Aung Hlain chuan Rohingya-te beih nia sawi chungchang hi an theih angin an chhui a, action pawh an la nghal zel tih a sawi.

Sipai pasarih hremte hi 33rd Light Infantry Division ami an ni a, Inn Din khuaa Muslim awmte umchhuah vek tumin beihpui an thlak a, paramilitary police force leh tualchhung Buddisht mite thawhpuiin Rohingya Muslim-te in leh ramte rawkin an halsak nia sawi a ni. Kum 2017 September 1 khan sipaite leh tual­chhung mi ṭhenkhatte chuan Rohingya mi 10-te hi firfiak nia sawiin an man a, a tukah heng mite hi an that vek a, an ruang hi thlan thuk lo taka laihah a rualin an phum a ni.