China Vice President-in Pakistan a tlawh

China Vice President Wang Qishan chu ni thum cham turin Pathianni khan Pakistan-ah a zin.

Vice President Wang Qishan hian Pathianni vek khan Pakistan President Arif Alvi leh Prime Minister Imran Khan-te a hmu a, thawhdunna tur inremna eng emaw zat an ziak nghal a ni. 

Pakistan President Alvi chuan kum 70, Communist Party of China (CPC) Pulitburo Standing Committe member Wang hnenah hian Pakistan-in civil mite hnena chawimawina sang a pek, Nishah-e-Pakistan a hlan nghal a ni. 

Pakistan Prime Minister Khan leh China Vice President Wang-ten Memorandum of Understandng (MoU) an ziah zingah hian economic leh technical affairs, disaster management leh agriculture sector lama ram pahnihte thawhdunna tur pawh a tel. 

Hruaitu pahnihte hian China-Pakistan Economic Corridor hnuaiah energy, technology leh education field-a mega development project pali an hawng bawk. University of Punjab-a Confucius Institute pawh an hawng a ni. 

China foreign ministry thupuangtu Lu Kang chuan Vice President Wang-an Pakistan a tlawh hian ram pahnihte inkarah inṭhianṭhatna leh inrintawnna ṭha zawk a siam ngei tur thu a sawi. Wang hian Pakistan zawhah hian Germany leh Netherlands pawh a tlawh nghal dawn a ni.