Israel-in inthlanpui hmachhawn ngai leh mai thei

Israel inthlanpui chu April thla khan neih ni mah se, nimin thleng khan sorkarna siam thei an la awm loh avangin inthlan buatsaih ṭhat leh a ngai mai thei. 

Inthlanpui neih zawh taka party mala seat la hnem ber, Likud party hruaitu, Prime Minister Benjamin Netanyahu chuan ṭangrual sorkar siam tumin party dangte a be kual mek a, mahse inremna an la siam thei lo. Thawhṭanni khan Israel parliament, Knesset chuan parliament ṭhiahna tur preliminary motion an pass. He bill hi vawiin hian ngaihtuah leh a ni dawn a, vote lak a ni ang. Pawm a nih chuan Israel chuan inthlan ṭhat a neih a ngai dawn a ni. 

PM Netanyahu hian zanin dar 9 thleng sorkar thar siam tur hian hun a nei dawn a ni. Nimina TV-a thu a sawiah, Netanyahu chuan ṭangrual sorkar siam tuma inbiakna neih chhunzawm a ni dawn tih a sawi a, inthlan ṭhat buatsaih leh chu thil ṭul lo leh hautak tak a nih thu a sawi. Voter-te duh dan zah sak a, right-wing sorkar din ngei a ṭul thu a sawi. 

Israel ram ṭhian ṭha, US President Donald Trump pawhin Israel buaina chu an chinfel theih thuai a beisei tih a sawi. "Israel ṭangrual sorkar siam tuma hmalakna chu a hlawhtlin a, Bibi (Netanyahu) nena America leh Israel thawhdunna chak leh ṭha zawk kan siam theih ngei ka duh a ni" tiin, tih tur hmabak tam tak an la neih thu a sawi lang. 

Netanyahu-an ṭangrual sorkar tura inbiakna a neihpui, Yisrael Beitenu party hruaitu leh defence minister hlui Avigdor Lieberam-a chuan a thil phut hrang hrangte a hnuhhniam duh loh avangin inremna an la siam thei lo a ni. Lieberman chuan an thil phut eng emaw zat an hnukhniam tawh a, hei bak chu an thei tawh lo tih an sawi. Lieberman chuan ṭangrual sorkarah an tel dawn a nih chuan Israel dangte an bawkin ultra-Orthodox Jews-te chu sipaia an ṭan ve ngei ngeina tur dan siam a phut a ni. Hetih lai hian Netanyahu-an inbiakna a neihpui mek zinga mi, ultra-Orthodox party-te chuan hei hi an duh lo thung. 

Israel ramah hian kum 18 tling chinte chu kum 2-3 chhung sipaiah an ṭan ngei ngei a ngai a, mahse ultra-Orthodox (Haredim tia sawi bawk) seminary student, Torah zirte chu awl an ni thung. Hei hi mi tam takin an duh tawh lo hle a, he dan hi siamṭhat a, sipaia 
ṭan luih tir ve ngei an nihna tura dan siamṭhat an phut a ni.