Japan-a pawikhawihna thlengah mi 2 an thi

Japan chhim lam, Kawasaki khuaah nimin khan chem keng mi pakhatin mi a pawng beih a, mi pahnih a vithlum a, midang 16-in hliam an tuar bawk. Hemi hnu hian pawikhawihtu hi amah a invithlum ve leh nghal a ni. 

Nippo Medical School Musahshi Kosugi Hospital deputy director Kiyoshi Matsuda chuan thite hi school zirlai, hmeichhe naupang kum 12 leh mipa kum 39 mi an nih thu a sawi. Pawikhawihtu hi kum 50 mi vel nia sawi a ni bawk. 

Japan Prime Minister Shinzo Abe chuan he pawikhawihna thleng hian a ti thinur hle tih a sawi a, thi chhungte a tuarpui thu leh, hliam tuarte pawh an ṭhat leh thuai a beisei thu a sawi. 

Mita hmutute sawi danin, pawikhawihtu hian bus stop bula zirlai naupangte awmna hmun chu chem kengin a pan a, "Ka that dawn che u," tia auin a bei zui tih an sawi. Pawikhawihna thlen hun hi an ram huna zing lam dar 8 vel a ni.