Sri Lanka-in thla khat chhungin Emergency thlahdul an tum
Sri Lanka President Maithripala Sirisena chuan Easter Sunday-ah firfiakten Kristian biak-in pathum leh luxury hotel pathum an beih avanga ram puma emergency puan chu thla khat chhungin thlah dul theih a ni tawh dawn tih a sawi.
President Sirisena chuan Colombo-a Australia, Canada, Japan, US leh European state palaite a kawmnaah, April 21-a bomb tihpuahnaa mawhphurtua puhte chu an vaiin man an ni tawh tih a sawi bawk. Sri Lanka sorkar chuan Kristian biak-in pathum leh hotel pathum beitute hi tualchhunga firfiak pawl, National Thowheeth Jama'ath-te an ni tih a sawi. Pawikhawihna thlennaa inhnamhnawihte man an nih theihna atan hian sorkar chuan April 22 khan thla khat chhung atan ram pumah emergency a puang nghal a, emergency law hnuaiah security force-te chuan an mi rinhlelhte chu court thupek nghak kher loin an man thei a ni. Sirisena chuan May 22 khan emergency hi thla khat dang atan a pawtsei leh a ni.
President chuan Sri Lanka chu 99%-in a him tawh tih sawiin, ramdang palaite hnenah an ramin firfiakte pawikhawihna avanga zin khapna, travel ban an puan chu hlih tir turin a ngen nghal bawk. Ram eng emaw zatin Sri Lanka zin khapna an tihchhuah vang hian khualzin tlawhtu pawh a tlahniam hman hle bawk. Sri Lanka in sum a lakluhna hnar pawimawh tak pakhat chu tourism hi a ni a, kum 2018 chhung khan tourism sector aṭanga a sum lakluh hi US dollar tluklehdingawn 4.4 a tling pha a ni.