Australia PM atan Scott Morrison lalut

Australia Prime Minister atan nimin khan Scott Morrison chu rinawmna thu tiam tira lakluh a ni. A rual hian a cabinet member-te pawh lakluh an ni nghal bawk. 

Queen Elizabeth II-i official representative, Governor-Gene­ral Sir Peter Cosgrove chuan an ram khawpui, Canber­ra-a Goverment House-ah PM Morrison, Deputy Prime Minister Michael McCormack leh cabinet member-te chu rinawm­na thu a tiam tir a ni. 

PM Morrison-a cabinet member-ah hian hmeichhia pasarih an awm a, Aboriginal zinga cabinet member hmasa ber turin Ken Wyatt pawh lakluh tel a ni. Foreign Minister atan Marise Payne-i dah a ni a, National deputy leader Bridget McKenzie pawh hmeichhe zinga Australia agriculture minister ni thei hmasa ber a ni bawk. 

Morrison hi Australia prime minister 30-na a ni a, kum riat chhunga Australia PM palina a ni bawk. Nikum August thlaa rorellai, Liberal Party inthlanah Morrison hi party hruaitu Malcolm Turnbull thlak tura thlan tlin a ni. Hemi hnu hian Morrison hian Malcolm hi thlakin PM atan lakuh a ni. 

May 18 khan inthlanpui buatsaih a ni a, he inthlannaah hian conservative Liberal-National party ṭangrualte chu thlan tlin an ni. PM atana lakluh a nih hnua thu a sawiah Morrison chuan, " Kan team inpe tak leh lungrual takte chuan Australia mipui nawlpuite duhdan leh beiseina te tihhlawhtlin chu an dah pawimawh ber tur  a ni. Mipuite chu rorel thei tura hun ṭha petute an ni," tiin a sawi a, mipuite rawngbawl sak theia an awm chhung chu nitin theihtawp an chhuah dawn tih a sawi. 

Australia 46th Parliament hi July thla chawlhkar khatnaah hawn a ni ang.