Pope Francis-an US border security leh Ber-lin wall tehkhin

Roman Catholic kohhran hotu, Pope Francis chuan United States border security chu Berlin indaidanna bang siam nen a tehkhin a, US President Donald Trump chu hmaichhanah a ngaihdan hi hrilh a tum tih a sawi. 

Pope Francis chuan President Trump-a hnenah ramri hungna bang siam chu thil dik lo a ni tih hrilh ngei a duh thu sawiin, chhungkuate ṭhendarh an nihna tur policy chu hmang chhunzawm lo tura hrilh a tum tih a sawi a ni. 

Migration chungchangah Pope leh Trump-te hi a hma pawhin an thu a lo inhmu lo tawh bawk a ni. Mexico-a Televisa-in inter­view a neihpuinaah, Pope Francis chuan ram venhim tumna atana daidanna bang siam tum chu a hriatthiam loh thu a sawi a, Berlin-ah hetianga daidanna bang lo siam tawhin mipuite natna tam tak a thlen tawh dante chu mitinin an hre vek a ni, a ti. "Naupangte an nu leh pa lak aṭanga lakhran chu dan kalh leh Kristiante tih loh tur a ni. He thil hi a nunrawnthlak a ni," tiin a sawi. Hetiang policy hman a ni chu a lungchhiatthlak hle tih a sawi bawk. 

Hetih lai hian President Trump chuan Mexico ramri hungna bang siam chu an rama ruihhlo tawlhruk ṭhin leh pawikhawihtute lut ṭhin venna atana thil pawimawh a nih thu a sawi thung. Mahse ramri hungna bang siamna tur atan hian sum tam tham tak a ngaih dawn avangin a sum hmuh dan tur chungchangah Democrat ho thunun, House of Representatives leh judge-te nen pawh an inhnial fo a ni.