Prime Minister atan Narendra Modi lakluh a ni ta Minister dangte pawhin rinawmna thu an tiam nghal

Nizan dar 7 khan Rashtrapati Bhavan-ah a term hnihna atan Narendra Modi chu Prime Minister atan lakluh a ni a, President Ram Nath Kovind chuan rinawmna thu a tiam tir. Prime Minister lakluh a nih rual hian a union minister-te pawh lakluh ve nghal an ni. Lakluh programme hi ramchhung media hrang hrangte chuan live-in an pechhuak a, thlirtu pawh an tam hle a ni.

BJP kaihhruai NDA chuan Lok Sabha inthlanah khan hnehna chiang takin an chang a, seat 542 awmah seat 353 hmuin, an khingpui Congress chuan seat 52 chiah an la thung. Narendra Modi hian dar 7 rik hma minute nge vel lek la awmah Rashtrapati Bhavan hi a thleng a, mipuiten an lo lawm hle. Dar 7 a rik velah Modi chuan Prime Minister ni tura rinawmna thu a tiam nghal a, Modi-an rinawmna thutiam a lak hnu hian Rajnath Singh ding zui ve nghalin, Amit Shah-a'n a chhunzawm ve leh a ni. Mi tam takin an rin lawk ang ngeiin Amit Shah hian a ṭum khat nan sorkar laipuiah union minister nihna a chelh ta a ni. 

Amit Shah a din zawh hnu hian Nitin Gadkari chuan a chhunzawm ve leh a, hemi zawh hnu hian D V Sadananda Gowda leh Nirmala Sitharaman-i te chuan chhunzawm ve lehin, Union Minister tur dangten an chhunzawm ve leh a ni. He thu ziah lai hian an portfolio tarlan a la ni lo. Union Minister hi 58 an awm a, Cabinet Minister 25 an awm. Minister of States (Independence charge) 9 an awm a, Minister of state hi 24 an awm. 

Lakluh inkhawma telte
BJP hruaitu liante chu an tel kim hle a, Bay of Bengal Initiative for Multi-Sectoral Technical and Economic Cooperation (BIMSTEC) member - Bangladesh, Myanmar, Sri Lanka, Thailand, Nepal leh Bhutan ram hruaitu lute hmuh tur an awm a, United Progressive Alliance (UPA) chairperson Sonia Gandhi, a fapa Congress president Rahul Gandhi leh prime minister hlui Manmohan Singh-te pawh hmuh tur an awm a ni. Reliance Industries chairman Mukesh Ambani chu a langsar hle bawk.

BJP hian ramdang 15 chu PM leh council of minister-te lakluh inkhawmah hian telpui turin an sawm a, chung zingah chuan US, Australia, Germany leh UK-te pawh an tel. Prime minister leh a cabinet minister-te lakluhna inkhawmah hian mi 6,000 vel zet an tel a ni.