Israel-in inthlan buatsaih ṭha dawn

Israel Prime Minister Ben­jamin Netanyahu chuan ṭangrual sorkar a siam theih tak loh avangin, Israel chuan inthlan ṭhat an hmabak. Inthlan ṭhat hi September 17-ah neih a ni dawn nia tarlan a ni. 

Israel hi thla hmasa khan an inthlang a, Prime Minister  Netanyahu-a kaihhruai Likud Party chuan seat 120 awmah seat 35 lain, party mala seat la tam ber an ni. Mahse sorkarna siam tur hian seat 61 an mamawh avangin party dang an thawhpui a ngai. Mahse party dang nena an inbiakna hi a hlawhchham avangin inthlan ṭhat hi a ngaih phah dawn ta a ni.

Netanyahu-a'n ṭangrual sorkar tura inbiakna a neihpui, Yisrael Beitenu party hruaitu leh defence minister hlui Avigdor Lieberman-a chuan a thil phut hrang hrangte a hnuhhniam duh loh avangin inremna an siam thei lo a ni. Lieberman chuan an thil phut eng emaw zat an hnukhniam tawh a, hei bak chu an thei tawh lo tih a sawi. 

Lieberman hian ṭangrual sorkarah an tel dawn a nih chuan Israel mi leh sa dangte ang bawkin, ultra-Orthodox Jews-te chu sipaia an ṭan ve ngei ngeina tur dan siam a phut a ni. Sorkarna siampui tura an biak party dang - ultra-Orthodox party-te chuan hei hi an duh lo thung. 

Israel ramah hian kum 18 tling chinte chu kum 2-3 chhung sipaiah an ṭan ngei ngei a ngai a, mahse ultra-Orthodox (Haredim tia sawi bawk) seminary student, Torah zirte chu an awl a, hei hi mi tam takin an duh tawh lo a ni. He dan hi siamṭhat a, sipaia ṭan luih tir ve ngei an nihna tura dan siamṭhat an phut a ni. 

Benjamin Natanyahu hian Thawhlehni zan dar 9 thleng khan sorkar thar siamna hun a nei a, mahse sorkarna siam tur hian party dangte hi inremna a siampui thei ta lo a ni.