Biden-a'n ni 100 chhungin Vaccine dose mtd 200 pek hman tum
US President Joe Biden chuan President office a luah aṭanga ni 100 chhungin America mite hnenah Covid-19 vaccine dose maktaduai 200 pek hman a tum tih Ningani khan a puang.
Biden hian office a luah hnuah a press conference hmasa ber chu Ningani khan a nei a, a hmaa ni 100 chhunga vaccine dose maktaduai 100 pek chhuah hman an tum thu a lo sawi tawh a, dose maktaduai 200 zawk pek hman ngei an tum tur thu a sawi a ni. "Kan thil tum hi a hautak hle tih ka hria, a tira kan tum lawk aiin a letin a tam a ni, mahse kan tih theih ngei ka beisei tlat a ni," a ti.
U.S. Centers for Disease Control and Prevention (CDC) chuan Ningani thleng khan vaccine hi dose maktaduai 133 pek a ni tawh tih sawiin, ram chhung hmun hrang hrangah vaccine dose maktaduai 173 chuang sem chhuah a ni tawh bawk a ni, a ti. America mipui zinga vaccine dose la zo tawh hi maktaduai 47 chuang an awm tawh a, hei hi an ram mipui aṭanga 14.3% vel an ni. Vaccine la zo tawh zingah hian kum 65 chung lam mi maktaduai 24.5 an tel.
President-in a ṭum khatna atana press conference a neihah hian US-Mexico border aṭanga pem luh an pun dan te, Covid-19 hripui leng mek te, voting rights law, Afghanistan aṭanga sipai lakchhuah leh China chungchangte a sawilang a ni. Biden chuan President kal chhuak ta, Donald Trump-a'n Taliban-te nena inbiakna an neihah Afghanistan aṭanga US sipaite lakchhuah hun tura May 1 an lo bithliah tawh chu thil harsa tak a ni dawn tih a sawi. "Tih tur hrang hrangte ngaihtuahin May 1 deadline chu zawm a harsa dawn hle a ni," a ti. Hemi rual hian kum thar lamah chuan America sipaite chu an awm tawh dawn lo tih a sawi bawk.
Kum 78 mi, President Joe Biden chuan kum 2024-a US President thlanna neih turah chuh leh theih a inbeisei thu a sawi a, mahse hei a tum nghet bur lo a, a beisei dan a nih thu a sawi nghal bawk. Mahse tunah kum 78 mi ni tawhin, President term khatna chelh tawha upa ber a ni.